Bakı Konqres Mərkəzində keçirilən “CAVAN Cosplay & Gaming Festivalı” geniş proqramı və maraqlı məzmunu ilə iştirakçılara unudulmaz anlar yaşadıb. “CAVAN” Gənclər Hərəkatı və Azerbaijan Cosplay Festivals tərəfindən təşkil olunan bu tədbir, bölgədə artan geek mədəniyyətinin önəmli bir mərhələsinə çevrilib.
QİA.az xəbər verir ki, festival müxtəlif fəaliyyətlərin rəngarəng vitrini ilə diqqət çəkib. Asia Hall-da yaradılmış böyük fotozonada Sakura ağacı, K-pop Koreya şəhəri və Koreya (Hanbok) və Yapon (Yukata) geyimləri təqdim olunub. Qonaqlar bu geyimləri geyinərək foto çəkdirmə fürsətindən yararlanıblar. Kids Hall-da qurulan masaüstü oyunlar uşaqlar üçün əyləncəli vaxt keçirməyə imkan yaradıb. Bundan əlavə, uşaqların üzünə zövqlərinə uyğun şəkillər çəkilən Face Art stendi də böyük maraq görüb.
Food Court-larda iştirakçılara müxtəlif kulinariya macəraları təqdim edilib. Konqres mərkəzinin daxilindəki Asiya mətbəxinin ləzzətləri ilə qonaqları sevindirərkən, festival iştirakçıları mərkəzin xaricindəki fast food maşınlarından ənənəvi festival qidaları ilə tanış olublar.
Festivalın yarmarkası geniş çeşiddə anime və geek mövzusunda məhsullar təqdim edib. Unikal kolleksiyalardan tutmuş, fandom modasının ən son tendensiyalarına qədər hər şey burada nümayiş olunub, iştirakçılar festivala aid bir xatirə ilə evlərinə qayıda biliblər. Festivalın diqqət mərkəzində yerləşən tüninq maşınları, avtomobil həvəskarları üçün maraqlı bir sərgi təqdim edib. Bu xüsusi tüninq maşınları, özəlliklə texnologiya və dizayn sahəsindəki yenilikləri ilə ziyarətçiləri cəlb edib.
Oyun zalı (Gaming Hall) kompüter oyunlarının həvəskarları üçün əsas məkan olub. Burada iştirakçılar Mortal Kombat, FIFA, Counter-Strike, Valorant və retro oyunları kimi məşhur oyunlarda bacarıqlarını sınayıblar. Səhnədə isə gaming sahəsində keçirilən müxtəlif oyunların qaliblərinə mükafatlar təqdim olunub.
Səhnədə, həmçinin geniş bir şou proqramı nümayiş olunub. Cosplayerlərin çıxışları, cosplay müsabiqəsi, IMEC musiqi məktəbindən rok konserti, Hogwarts tamaşası, Alice in Wonderland tamaşası və digər maraqlı nümayişlər ziyarətçilərin böyük marağına səbəb olub. Festivalın əsas atraksionlarından biri olan Cosplay Şousunda Solo və Qrup Defile performansları yer alıb.
Festivalın sonunda keçirilən mükafatlandırma mərasimində Solo cosplay müsabiqəsinin qalibi Vlicia Wolf oldu, ikinci yeri Lee Sonia, üçüncü yeri isə Alina Spellman qazanıb. Qrup cosplay müsabiqəsində birinci yeri The Ultimate Punishment, ikinci yeri Hats and Hearts, üçüncü yeri isə Avatar komandası qazanıb.
Festival iştirakçıların yaddaşında xoş xatirələr və əyləncəli anlarla dolu bir gün kimi qalıb. CAVAN Cosplay & Gaming Festivalı, öz zəngin proqramı ilə hər kəsin zövqünü oxşayıb.
