Müasir tariximizin böyük bir dövrü xalqımızın Ümummilli Lideri, müasir müstəqil Azərbaycanın qurucusu Heydər Əliyevin adı ilə bağlıdır. Ulu Öndər Heydər Əliyevin müəyyənləşdirdiyi strateji inkişaf konsepsiyası tarixi uğurlarımızın əsas istiqamətverici qüvvəsi olmaqla, bu gün də xalqımızın parlaq gələcəyinə aparan yola işıq salır.
Bu fikirlər Milli Məclisin deputatı Mircəlil Qasımlının “Azərbaycanın qazandığı bütün tarixi nailiyyətlərdə Ümummilli Liderin imzası var” sərlövhəli məqaləsində yer alıb.
Məqalədə deyilir ki, 1990-cı illərin əvvəllərində Azərbaycan üçün ağır və böhranlı illərdə xalqın təkidli tələbi ilə siyasi hakimiyyətə qayıdan Ümummilli Lider demokratik və hüquqi milli dövlət quruculuğunu, müstəqilliyimizin möhkəmləndirilməsini, xalqımızın firavan həyatının təmin edilməsini, ölkəmizin dünyada söz və nüfuz sahibinə çevrilməsini əsas hədəflər kimi müəyyənləşdirdi.
Bu xüsusda, Ulu Öndər tərəfindən Azərbaycanın potensial imkanları, milli mənafeləri, həmçinin qlobal iqtisadi meyillər, geosiyasi reallıqlar və digər vacib amillər nəzərə alınmaqla hazırlanan strateji inkişaf konsepsiyası ölkəmizin hərtərəfli tərəqqisində, qarşıya qoyulan vəzifələrə nail olunmasında önəmli rol oynadı.
1969-1982-ci illər: Müstəqil Azərbaycanın qurulmasına zəmin yaradacaq müdrik addımlar
Sovet hakimiyyəti illərində 1969-cu ilə qədər olan müddətdə Azərbaycan İttifaqın digər respublikaları ilə müqayisədə geridə qalır, iqtisadi tənəzzül dövrünü yaşayırdı. 1969-cu il iyulun 14-də Ümummilli Lider Heydər Əliyevin Azərbaycanda birinci dəfə siyasi hakimiyyətə gəlişi ilə respublikamızda quruculuq prosesinə start verildi, Azərbaycan tərəqqi dövrünə qədəm qoydu. İqtisadiyyatın ayrı-ayrı sahələrində inkişafın təmin olunması, sənayenin gücləndirilməsi istiqamətlərində önəmli addımlar atıldı, bərpa-quruculuq prosesi həyata keçirildi. 1982-ci ilədək respublikada 200-dən çox yeni sənaye müəssisəsi yaradıldı, böyük iqtisadi potensiala malik fabriklər, zavodlar fəaliyyətə başladı, təhsil və mədəniyyət ocaqları inşa edildi. Bakı Məişət Kondisionerləri zavodu, Bakı Dərin Özüllər zavodu, Bakı Neftayırma zavodunun emal kompleksi, metro stansiyaları və digər sənaye, infrastruktur obyektlərinin fəaliyyətə başlaması, yeni iş yerlərinin yaradılması, kənd təsərrüfatının, neft sektorunun inkişafı istiqamətində atılan məqsədyönlü addımlar nəticəsində qısa müddətdə Azərbaycan İttifaqın ən qabaqcıl respublikalarından birinə çevrildi.
Ümummilli Lider azərbaycanlı gənclərin ən nüfuzlu ali məktəblərdə təhsil almalarını fəaliyyətinin prioritet istiqamətlərindən biri kimi müəyyənləşdirmişdi. Bu, ölkəmizin kadr potensialının, o cümlədən müxtəlif sahələr üzrə peşəkar mütəxəssislərin, hərbçilərin formalaşdırılmasında olduqca önəmli rol oynadı.
Beləliklə, Ulu Öndər Heydər Əliyev tərəfindən 1969-1982-ci illərdə böyük uzaqgörənliklə atılan addımlar respublikanın inkişafını təmin etməklə yanaşı, gələcək müasir müstəqil Azərbaycanın qurulmasına hərtərəfli zəmin yaratdı.
Xilaskarlıq və quruculuq missiyası
1990-cı illərin əvvəllərini müasir Azərbaycan tarixinin ən ağır və çətin dövrü kimi xarakterizə etmək olar. İqtisadi və siyasi böhranla müşahidə olunan bu dövr Ermənistanın işğalçılıq siyasəti ilə daha da ağırlaşırdı.
Azərbaycan xalqı belə çətin məqamda gələcək taleyini Ulu Öndərə etibar etdi. Xalq əmin idi ki, Ümummilli Lider zəngin təcrübəsi, müdrik və qətiyyətli siyasəti, düşünülmüş və nəticəyə hesablanmış qərarları ilə ölkəmizi bu çətin sınaqdan üzüağ çıxaracaq.
Gücünü xalqının inamından alan Ulu Öndər məsuliyyəti öz üzərinə götürərək xilaskarlıq missiyasını uğurla həyata keçirdi, Azərbaycanı düşdüyü ağır vəziyyətdən xilas etdi, ölkəmizi tərəqqi, inkişaf yoluna çıxardı.
İlk növbədə, dövlət müstəqilliyimizə təhdid yaradan bütün ünsürlər və risklər zərərsizləşdirildi, davamlı və sarsılmaz əsaslara malik sabitlik təmin olundu. Dövlətin siyasi, iqtisadi dayaqları formalaşdırıldı, qanunvericilik bazasının yaradılması istiqamətində işlər həyata keçirildi, müstəqil Azərbaycanın Konstitusiyası hazırlandı və ümumxalq səsverməsi ilə qəbul edildi. Ölkədə ardıcıl islahatlar ilə müşayiət olunan iqtisadi quruculuq prosesinə başlanıldı, əhalinin rifahının yaxşılaşdırılmasına xidmət edən davamlı sosial tədbirlər həyata keçirildi. Qısa müddət ərzində ordu quruculuğu istiqamətində zəruri addımlar atıldı, peşəkar ordu yaradıldı, onun maddi-texniki bazası möhkəmləndirildi.
Bu il 30-cu ildönümünün qeyd edildiyi “Əsrin müqaviləsi”nin imzalanması ilə ölkəmizin yeni enerji strategiyasının icrasına başlanıldı. Neft-qaz sənayemizin yenidən dirçəlməsinə, Azərbaycana xarici investorların cəlb olunmasına şərait yaradan bu sənəd ölkəmizin hərtərəfli inkişafına əsaslı zəmin yaratdı.
Ulu Öndərin müəyyənləşdirdiyi uğurlu xarici siyasət kursu, çoxşaxəli fəal diplomatiyası nəticəsində Azərbaycan ilə dünyanın aparıcı dövlətləri və beynəlxalq təsisatlar arasında qarşılıqlı faydalı əlaqələr quruldu.
Beləliklə, Ümummilli Liderin mükəmməl idarəçilik bacarığı, müdrik siyasəti və zəngin təcrübəsi nəticəsində qısa müddət ərzində xalqımız çətin sınaqlardan uğurla çıxaraq, müstəqilliyini möhkəmləndirdi və əbədi etdi.
Siyasi varislik missiyası: Reallığa çevrilən strateji hədəflər
Fəaliyyətinin bütün mərhələlərində Azərbaycana, xalqımıza şərəflə xidmət edən, daim onun maraqlarını uca tutan Ümummilli Lider Heydər Əliyev ölkəmizi güclü və qüdrətli dövlətə çevirmək istəyirdi. 1993-2003-cü illərdə bu istiqamətdə görülən mühüm, böyükmiqyaslı işlər buna möhkəm əsaslar yaratmışdı. Lakin perspektivdə qüdrətli Azərbaycanın formalaşmasına xidmət edəcək nəhəng layihələr, görüləsi işlər çox idi.
Bu xüsusda, Ulu Öndərin müəyyənləşdirdiyi strateji hədəflərə nail olmaq, mürəkkəb regionda yerləşən Azərbaycanı dayanıqlı inkişafa malik qüdrətli dövlətə çevirmək çətin missiya idi.
2003-cü ildə Azərbaycan xalqının böyük inamı və qətiyyətli iradəsi nəticəsində Prezident seçkilərində qalib gələn İlham Əliyev andiçmə mərasimindəki çıxışında Ulu Öndərin müəyyənləşdirdiyi siyasi xəttə sadiq qalacağını bəyan etdi: “Azərbaycanı qüdrətli dövlətə çevirmək üçün ən başlıcası, ölkədə Heydər Əliyevin siyasəti davam etdirilməlidir. Bu gün yüksək kürsüdən çıxış edərkən mən Azərbaycan xalqına söz verirəm ki, bu siyasətə sadiq qalacağam, heç vaxt bu yoldan dönməyəcəyəm, Heydər Əliyevin siyasətini davam etdirəcəyəm”.
Ötən 21 il ərzində Azərbaycan Respublikasının Prezidenti İlham Əliyev Ulu Öndərin müəyyənləşdiyi inkişaf strategiyasını uğurla davam etdirərək xalqımıza özünün çoxəsrlik dövlətçilik tarixinin ən möhtəşəm nailiyyətlərini qazandırdı, Azərbaycanı dayanıqlı iqtisadiyyata, güclü siyasi iradəyə, qüdrətli orduya malik ölkəyə, qlobal əhəmiyyətli layihələri uğurla icra edən dövlətə çevirdi. 44 günlük Vətən müharibəsində və antiterror əməliyyatında qazanılan şanlı qələbələr nəticəsində ölkəmizin ərazi bütövlüyü və dövlət suverenliyi tam bərpa edildi, Azərbaycan ərazisində separatizmin kökü tamamilə kəsildi.
Ulu Öndərin qurub yaratdığı, Prezident İlham Əliyevin rəhbərliyi ilə böyük inkişaf yolu keçən Azərbaycan bu gün qalib ölkə kimi beynəlxalq münasibətlər sistemində böyük hörmət və nüfuz sahibinə çevrilib. Ötən ay COP29 kimi mötəbər tədbirə uğurla ev sahibliyi edən Azərbaycan liderlik qabiliyyətini və yüksək təşkilatçılıq bacarığını bir daha bütün dünyaya nümayiş etdirdi.
Dahi şəxsiyyət Heydər Əliyevin parlaq ideyaları əsasında qarşıya qoyulan bütün strateji hədəflərə nail olan Azərbaycan bu gün Prezident İlham Əliyevin müdrik rəhbərliyi ilə inkişafının yeni mərhələsində inamla irəliləyir. Bugünkü qüdrətli Azərbaycan xalqımızın Ulu Öndərin xatirəsinə olan dərin hörmət və ehtiramının ən gözəl nümunəsidir.