Bu il Həcc ziyarətində 2,6 milyon zəvvar iştirak edəcək.
QİA.az Türkiyə mətbuatına istinadla xəbər verir ki, bu barədə Səudiyyə Ərəbistanının İki Müqəddəs Məscid İşləri üzrə Rəyasət Heyətinin sədri Əbdülrəhman əl-Sudais məlumat verib.
Səudiyyə Ərəbistanı qarşıdan gələn Həcc mövsümü ərəfəsində ən böyük əməliyyat planını açıqlayıb.
“Covid-19” pandemiyasının başlanmasından bəri ilk dəfə olaraq zəvvarların sayına qoyulan məhdudiyyətlər aradan qaldırılıb.
Bu il Həcc ziyarətində iştirak edəcəyi gözlənilən milyonlarla zəvvarlara kömək etmək üçün 14 min heyət üzvü, eləcə də 8 mindən çox könüllü fəaliyyət göstərəcək.
Səudiyyə Ərəbistanının müqəddəs Məkkə şəhərinə Həcc ziyarəti iyunun 26-dan başlanacaq.
Əl-Sudaisin sözlərinə görə, Məkkədəki Məscidül-Həram və Mədinədəki Peyğəmbər məscidində ümumilikdə 300 min nüsxə Quran paylanacaq. Tərcümə xidmətləri və bələdçilər dünyanın hər yerindən gələn milyonlarla insanı əhatə etmək üçün 51 dildə yayımlanan saytlarda xidmət göstərəcəklər. Bununla yanaşı, Həcc ziyarəti zamanı Quran tilavəti və hifzi seminarları da təşkil olunacaq.
Həcc ziyarətinin təşkilatçıları İki Müqəddəs məsciddə 40 milyon litr Zəmzəm suyunu paylamaq üçün 30 mindən çox məntəqə yaradıb və hər gün zəvvarlara ən azı iki milyon şüşə təqdim ediləcək.
Saytlardakı mobil proqramlar və robotlar da daxil olmaqla, zəvvarların ümumi təcrübəsini artırmaq məqsədilə rəqəmsal texnologiyadan istifadə olunacaq.