Baş Dövlət Yol Polisi İdarəsi (BDYPİ) dövlət qeydiyyat nişanları ilə bağlı sürücülərə müraciət edib. BDYPİ-dən Qia.az-a daxil olan müraciətdə bildirilir ki, son günlər müşahidə olunan yağmurlu hava şəraiti ilə əlaqədar avtomobillərin dövlət qeydiyyat nişanlarının təmizliyinə daha çox diqqət ayırmalıdır:
“Təəssüf ki, bəzən yağmurlu hava şəraitindən sui-istifadə edərək avtomobilinin dövlət qeydiyyat nişanlarının təmizliyinə əhəmiyyət verməyən, hətta bilərəkdən nişanların üstünü süni şəkildə çirkləndirən sürücülərə rast gəlinir ki, bu da xoşagəlməz nəticələrə səbəb olur”.
Müraciətdə vurğulanır ki, qanunvericiliyə əsasən hərəkətdə olan nəqliyyat vasitəsinin dövlət qeydiyyat nişanlarının aydın görünməsi üçün onun təmiz saxlanılması təmin edilməlidir: “Bu vəzifənin yerinə yetirilməməsi avtomobilin istismarı qaydalarının pozulması hesab edilir və inzibati məsuliyyət yaradır”.
İdarə sürücüləri dövlət qeydiyyat nişanlarını təmiz saxlamaqla həm üzərinə düşən vəzifəni yerinə yetirməyə, həm də ölkədə sürücü intizamının yüksəlməsinə töhfə verməyə çağırıb.
Ads by
0
Reklamınızı SmartBee ilə effektiv edin.