Tətillərini Azərbaycanda keçirməyə üstünlük verən diaspor nümayəndələrinin mədəniyyət paytaxtımız Şuşaya 12-ci səfəri baş tutub. Diasporla İş üzrə Dövlət Komitəsinin dəstəyi ilə “Dəmir yumruğun gücü ilə Şuşadayıq” layihəsi çərçivəsində on ikinci dəfə gerçəkləşən səfərdə 27 ölkədən 140 nəfərə yaxın diaspor nümayəndəsi iştirak edib.
QİA.az xəbər verir ki, bu barədə Diasporla İş üzrə Dövlət Komitəsindən AZƏRTAC-a bildirilib ki, səfər zamanı Cıdır düzü, Molla Pənah Vaqifin məqbərəsi, Aşağı və Yuxarı Gövhər Ağa məscidləri, Gəncə Qapısı, “Güllələnmiş heykəllər”in yerləşdirildiyi meydan və digər görməli yerlər ziyarət edilib. Diaspor nümayəndələrinə Qarabağın incisi olan Şuşada aparılan yenidənqurma və abadlıq işləri ilə bağlı məlumat verilib. Diaspor nümayəndələri Cıdır düzündə Dövlət Himninin sədaları altında Azərbaycan Bayrağı açıb, “Qarabağ Azərbaycandır!” şüarı səsləndiriblər. Gəncə Qapısı önündə Azərbaycanın ərazi bütövlüyü uğrunda canından keçən şəhidlərimizin əziz xatirəsi yad edilib. Onlar bu xoşbəxtliyi xalqımıza bəxş edən Müzəffər Ali Baş Komandana və Azərbaycan Ordusuna təşəkkür ediblər.
Qeyd edək ki, Prezident İlham Əliyevin Dünya Azərbaycanlılarının V Qurultayında səsləndirdiyi tövsiyələrdə xaricdə yaşayan soydaşlarımızın hər il tarixi vətənlərini, xüsusilə də azad olunmuş torpaqlarımızı ziyarət etməsinin önəminə diqqət cəlb edilib.
Komitənin təşkilatçılığı ilə “Biz dəmir yumruğun gücü ilə Şuşadayıq” şüarı altında reallaşan səfərlər Azərbaycan diaspor tarixinin ən mühüm hadisələrindən biridir.
Bundan başqa, Komitə mütəmadi olaraq beynəlxalq ictimaiyyətin məlumatlandırılmasında böyük rol oynayan xarici jurnalistlərin və elm adamlarının Şuşaya, eləcə də işğaldan azad edilmiş digər rayonlara səfərlərini təşkil edir.
