Azərbaycan ərazilərində mövcud olmuş qanunsuz rejimə və erməni silahlı birləşmələrinə yardım məqsədilə xarici ölkələrdəki erməni diaspor təşkilatları tərəfindən iri həcmli maliyyə ianələri toplanması haqda tanınmış kolumbiyalı jurnalist, teleaparıcı Roberto Trobaxonun təqdimatında xüsusi videosüjet hazırlanıb.
Bu barədə “QİA.az”a Azərbaycanın Meksikadakı səfirliyindən məlumat.
Süjetdə Ermənistan hökuməti və erməni icma təşkilatlarının dünyanın müxtəlif ölkələrində yaşayan ermənilərdən humanitar məqsədlər adı altında kütləvi həcmdə maliyyə ianələri topladığı və bu vəsaitlərin Ermənistan silahlı qüvvələrinin təchizatının artırılmasına, eləcə də 44 günlük müharibə zamanı Azərbaycana qarşı hərbi əməliyyatlara qatılmış muzdlu döyüşçülər və terrorçuların saxlanmasına sərf olunduğu deyilir.
Aparıcı bildirir ki, Ermənistan tərəfinin təxribatları nəticəsində başlanmış və Azərbaycanın öz torpaqlarını işğaldan azad etməsi ilə nəticələnmiş 44 günlük müharibə başa çatanadək kampaniya çərçivəsində 73 müxtəlif ölkədə yaşayan 8 milyona yaxın icma üzvündən 170 milyon ABŞ dolları məbləğində vəsait toplanmışdır və bu proses hələ də davam etdirilir.
Süjetdə xaricdə yaşayan erməni mühacirlərin etibarından sui-istifadə edilərək toplanmış bu vəsaitin böyük hissəsinin Ermənistanın dövlət büdcəsinə köçürüldüyü, bu məqamın Ermənistan rəhbərliyi tərəfindən də etiraf edildiyi və bu faktın Ermənistan hökumətinin Azərbaycana qarşı apardığı müharibəni həmvətənlərinə humanitar yardım olaraq erməni mühacirlərin ianə etdiyi vəsaitdən istifadə etməklə maliyyələşdirdiyini sübut etdiyi qeyd olunur.
Müharibə bitdikdən sonra da erməni diaspor liderlərinin külli miqdarda vəsait yığmaqda davam etdiyi, yaxın vaxtlarda ABŞ və Fransada təşkil etdikləri iki müxtəlif teletonda toplam 30 milyon dollar əlavə vəsait topladıqları diqqətə çatdırılır.
Sonda bu vəsaitlərin qeyri-şəffaf və qanunsuz şəkildə idarə edilməsinə dair çoxsaylı faktlar olduğu nəzərə alınaraq, erməni mühacirlərin diaspor təşkilatlarının maliyyə fəaliyyətlərinə ciddi nəzarət etməli olduqları deyilir.
https://www.filemail.com/d/gtuzprxtudqpbdz
