Türkiyənin Kocaeli şəhərində fəaliyyət göstərən Heydər Əliyev Mədəniyyət Evi Dərnəyi və Türkiyə Daxili İşlər Nazirliyi Mülki Toplumla Əlaqələr Mərkəzinin birgə təşkilatçılığı ilə “Erməni ordusu və dəstələri tərəfindən törədilmiş qətliamlar” adlı konfrans keçirilib.
“QİA.AZ” xəbər verir ki, bu barədə məlumatı Türkiyənin Azərbaycandakı səfirliyi yayıb.
Məlumata görə, konfrans Türkiyə Azərbaycan Dərnəkləri Federasiyası və Kocaeli Azərbaycan Heydər Əliyev Mədəniyyət Evi Dərnəyinin təşkilatçılığı ilə baş tutub.
Türkiyə və Azərbaycan dövlət himnləri səsləndirildikdən sonra proqram koordinatoru Alptəkin Cevhərli çıxış edib.
“Ermənilərin türklərə qarşı törətdiyi soyqırımla bağlı ilk konfransı ötən il təşkil etmişdik və bu gün ikinci belə bir tədbiri təşkil etməkdən qürur duyuruq”, – A.Cevhərli deyib.
O, həmçinin son bir il ərzində görülən işlərdən söz açıb.
Türkiyə Azərbaycan Dərnəkləri Federasiyasının sədri və Kocaeli Azərbaycan Heydər Əliyev Mədəniyyət Evi Dərnəyinin rəhbəri Bilal Dündar “Soyqırım” muzeyinin açıldığını və muzeydə 134 əsərin sərgiləndiyini bildirib.
“2015-ci ildə İzmit Bələdiyyəsi ilə birlikdə Bakıda İzmit Parkı açıldı. Burada, İcra hakimiyyətinin binası qarşısında biz də Xocalı şəhidlərinə abidə ucaltdıq. Cəmiyyəti məlumatlandırmaq vacibdir. Bu illər ərzində çox təhditlərlə üzləşdim, nə qədər çox çalışdıq, qarşımıza bir o qədər çox maneə çıxdı. Amma Kocaelidə tarix yazdığımızı düşünürəm. Qəhrəman Azərbaycan ordusu Ermənistanın qəsb etdiyi torpaqları geri aldı. Müharibə vaxtı başda prezidentimiz və siyasi partiyaların Azərbaycanın yanında olması ilə yanaşı, Kocaelidəki millət vəkillərimiz, bələdiyyə başqanlarımız, siyasi partiyaların vilayət və rayon sədrləri, qeyri-hökumət təşkilatların rəhbərləri və başqaları bizim Mədəniyyət Evinə gələrək, öz dəstəklərini veriblər və Azərbaycanın yanında olduqlarını bildiriblər,” – B.Dündar deyib.
O, çıxışının sonunda qeyd edib ki, yaxın vaxtlarda Kocaelidə şəhid general Polad Həşimov adına parkın açılışı olacaq.
AKP İstanbul millət vəkili Şamil Ayrım ermənilərin türk millətinə verdiyi zülmün nə qədər ağır olduğunu açıq gördüyünü bildirib: “Azərbaycan 1991-ci ildə müstəqilliyinə qovuşdu və bu zaman ruslardan dəstək alan ermənilər Azərbaycan torpaqlarının 20 faizini işğal etdi, insanlar evlərindən, torpaqlarından didərgin salındılar və onlar 30 il öz yurdlarına qayıtmaq üçün mübarizə apardılar. BMT-nin qərarları yerinə yetirilmədi. Şəxsən məndən soruşsanız, deyərəm ki, Ermənistan adlı dövlət yoxdur, sadəcə xalqını düşünməyən, enerjisini, təhlükəsizliyini Rusiyadan, Amerikadan, Avropadan alan bir Ermənistan var. Bir ölkə öz vətəndaşlarını niyə bu qədər cəzalandırır? Baxın, ən qəsa yol Ermənistandan keçir, bu gün qarşılarına çox gözəl fürsət çıxıb. Prezidentimiz də dedi: Gəlin bu bölgədə sülhü, dostluğu, qonşuluğu daha da gücləndirək, iqtisadiyyatımızı canlandıraq. 10 noyabrda bir saziş imzalanıb, orada Zəngəzur dəhlizinin açılması qərara alınıb. Ermənilər qarşı çıxır, amma Rusiya “hə” deyir və görünən odur ki, bu dəhliz mütləq açılacaq”.
AKP Kocaeli millət vəkili İlyas Şəkər qeyd edib ki, tarixi bilmək vacibdir, yoxsa gələcəklə bağlı tədbir görmək mümkün olmaz: “Osmanlı-Rusiya müharibəsindən sonra Osmanlını, Anadolu torpaqlarını paylaşmaq istəyən xarici qüvvələr ermənilərdən istifadə etməyə başladılar. Onlar da türklərə qarşı Anadoluda, Qafqazda qətliamlar törətməyə başladılar. Təəssüf ki, PKK-nın da içində erməniləri görürük. Türkiyə gücləndikcə, böyüdükcə, inkişaf etdikcə ona qarşı hücumlar da davam edəcək”.
İ.Şəkər vurğulayıb ki, bu gün Türkiyənin güclü olması, Azəbaycanın Qarabağdakı qələbəsinə öz töhfəsini verib: “Türkiyənin verdiyi mənəvi və texniki dəstək vacib idi. Müdafiə sənayesində 70 faiz milliləşmə var. Bunu Qarabağda, eynilə də Anadolunun cənub-şərqində gedən əməliyyatlarda görürük. Ona görə də Türkiyəni sıxışdırırlar. Biz bu gerçəkləri görməliyik. Ermənilər həyata keçirdiyi qətliamları Türkiyənin boynuna yükləməyə çalışırlar. Hər şey açıq aydın görünür”.
Kocaeli Böyükşəhər Bələdiyyəsinin sədr əvəzi Yaşar Çakmak da tədbirdə çıxış edib.
“Ermənilər bizim Qafqazla aramıza soxulmuş bir xəncərdir. Əsrlər boyu hər zaman himayə etdiyimiz, qoruduğumuz və dövlətdə yüksək vəzifələrə gətirdiyimiz bu insanlar ən çox ehtiyac duyduğumuz zamanda, 1915-ci ildə insanlarımız can verərkən Şərqi Anadoluda üsyana başladılar. Onların yerləri dəyişdirildi. Hələ də aramızda dövlətdən kömək alan, parlamentdə oturan, 1915-ci il hadisələrini unutmayın deyənlər var. Azərbaycanla birlik və dostluq dünya üçün vacibdir, bu məsələ üzərində işləmək və gələcək nəsillərə ötürmək bizim borcumuzdur”, – o deyib.