Xəzər dənizinin suyunun azalması ilə əlaqədar bərələrin sayını artırmaq, onları modernləşdirmək lazımdır.
QİA.az “Report”un Tbilisiyə ezam olunmuş əməkdaşının verdiyi məlumata istinad ilə xəbər verir ki, bunu Mərkəzi Asiya Nəqliyyat-Logistika Tərəfdaşlığının sədri Larisa Kislyakova Asiya İnkişaf Bankının (ADB) 57-ci illik toplantısı çərçivəsində keçirilən “Mərkəzi Asiya Regional İqtisadi Əməkdaşlıq (CAREC) Programı regionunda daha ekoloji cəhətdən təmiz əlavə dəyər zəncirlərinin maliyyələşdirilməsi” adlı tədbirdə deyib.“Biz Azərbaycan və Gürcüstanın Orta Dəhlizdə birgə nəzarət-buraxılış məntəqəsi yaratmasını gözləyirik”, – o vurğulayıb.
Qeyd edək ki, Orta Dəhliz 2014-cü ilin fevralında Azərbaycan, Qazaxıstan və Gürcüstanın müvafiq strukturlarının iştirakı ilə yaradılıb.
Daha sonra layihəyə Ukrayna, Rumıniya və Polşa qoşulub. Hazırda marşrut Çin-Qazaxıstan sərhədindən başlayır və Qazaxıstan, Xəzər dənizi, Azərbaycan və Gürcüstan ərazisindən keçərək Avropaya uzanır. Bütün marşrut üzrə vahid tarif yaradılıb və “bir pəncərə” prinsipi tətbiq edilir.