Qia.az xəbər verir ki, “Universitet Liqası”nın payız mövsümü 21 dekabr tarixində uğurla yekunlaşıb. Oktyabr ayında start götürən bu mövsüm 3 ay ərzində tələbələrin intellektual mübarizələrdə iştirak etdiyi maraqlı və rəqabətli turnirlərə ev sahibliyi edib. Ümumilikdə, ölkənin 6 regionundan 25 ali təhsil müəssisəsini təmsil edən 250-dən çox komanda turnirdə iştirak edib.
Sezonun sonunda “Bilik Kuboku” uğrunda mübarizədə Bakı Ali Neft Məktəbinin “Better Call Piwik” komandası qalib gəlib. Bu komanda bütün rəqiblərini geridə qoyaraq birinci yerə layiq görülüb. İkinci yerə Azərbaycan Tibb Universitetinin “HipHoprat” komandası, üçüncü yerə isə Naxçıvan Dövlət Universitetinin “Sirab” komandası çıxıb. Qaliblər kubok, medal, diplom və dəyərli hədiyyələrlə mükafatlandırılıblar.
Layihənin əsas məqsədi ana dilində intellektual hərəkatın inkişafına dəstək vermək, tələbələr arasında intellektual oyunlara marağı artırmaq, gənclərin asudə vaxtını səmərəli təşkil etmək və gələcəkdə intellektual potensiala malik kadrların yetişdirilməsinə töhfə verməkdən ibarətdir.
Qeyd edək ki, “Universitet Liqası” layihəsi Azərbaycan Gənclər Fondunun dəstəyi, Azərbaycan Tələbə Gənclər Təşkilatları İttifaqı və Xəzər İntellektual Gənclər Klubunun birgə təşkilatçılığı ilə həyata keçirilib. Layihənin gələn ildən Tələbələrarası Azərbaycan Çempionatı olaraq davam etdirilməsi nəzərdə tutulur.
