Azərbaycanın qeyrət qalası adlandırılan Sədərək rayonunun Şəhidlər xiyabanında Vətən müharibəsində şəhadətə ucalan kiçik çavuş Tağı Abdullazadənin anım tədbiri olub.
“QİA.az” xəbər verir ki, tədbirdə çıxış edən Sədərək Rayon İcra Hakimiyyəti aparatının Vətən müharibəsi iştirakçıları və şəhid ailələri ilə işin təşkili şöbəsinin müdiri Vüqar Süleymanov Müzəffər Ali Baş Komandan İlham Əliyevin rəhbərliyi ilə qələbə ilə başa çatan 44 günlük müharibənin Azərbaycan xalqının mübarizliyini və yenilməzliyini dünyaya bir daha nümayiş etdirdiyini vurğulayıb. Bildirib ki, tarixin bütün dövrlərində öz döyüşkənliyi, cəsarəti, igidliyi və qəhrəmanlığı ilə tanınan naxçıvanlılar həmişə olduğu kimi, Böyük Qələbə ilə başa çatan müharibədə də öz sözünü deyib. Onlardan biri də Sədərəkdə doğulub boya-başa çatan kiçik çavuş Tağı Abdullazadədir. Qeyd edilib ki, bu gün şəhidimizin dünyaya göz açdığı gündür. Belə qəhrəmanlarımızın həyat yolu əsl vətənpərvərlik nümunəsidir.
Yeni Azərbaycan Partiyası Sədərək Rayon Təşkilatının sədri, Naxçıvan Muxtar Respublikası Ali Məclisinin deputatı Arif Qasımov, Sədərək Rayon İcra Hakimiyyəti başçısının müavini, İctimai-siyasi və humanitar məsələlər şöbəsinin müdiri Mahirə Adnayeva, Naxçıvan Muxtar Respublikası Ali Məclisinin deputatı, Sədərək Rayon Qadınlar Şurasının sədri Vüsalə Əliyeva çıxış edərək vurğulayıblar ki, Vətən müharibəsi Azərbaycan Prezidenti, Müzəffər Ali Baş Komandan İlham Əliyevin mahir sərkərdəlik bacarığını, çətin şəraitdə düzgün qərar vermək istedadını, dövlət-xalq-ordu birliyini bir daha bütün dünyaya nümayiş etdirdi.
Sədərək döyüşlərinin iştirakçısı, şəhid Tağı Abdullazadənin atası İlham Abdullayev muxtar respublikada şəhid ailələri və yaxınlarının dövlətimiz tərəfindən hər cür qayğı ilə əhatə edildiyini vurğulayıb, göstərilən diqqətə görə minnətdarlığını bildirib.
Şəhid Tağı Abdullazadənin bölük komandiri, Vətən müharibəsi qazisi, mayor Təbriz Zeynalov 30 ilə yaxındır ki, işğal altında olan torpaqlarımızın Ali Baş Komandanın rəhbərliyi ilə azad edilməsində igid oğullarımızın göstərdiyi böyük rəşadət və hünərdən, eləcə də döyüş yoldaşı Tağının vətənpərvərliyindən, qəhrəmanlıqlarından bəhs edib, müharibə xatirələrini tədbir iştirakçıları ilə bölüşüb.
Sonda şəhidlərimizin ruhuna dualar oxunub, məktəblilər vətənpərvərlik mövzusunda şeirlər söyləyiblər.
