Ulu Öndərin 100-cü ildönümü və cənab İlham Əliyevin Prezident seçilməsinin 20 illiyi ilə bağlı tədbirlər keçirilib

Dek 13, 2023

Əlahiddə Ümumqoşun Orduda Ümummilli Lider Heydər Əliyevin anadan olmasının 100-cü ildönümü və cənab İlham Əliyevin Azərbaycan Respublikasının Prezidenti seçilməsinin 20 illiyi ilə əlaqədar silsilə tədbirlər keçirilir.

Müdafiə Nazirliyindən QİA.az-a verilən məlumata görə, Ulu Öndər Heydər Əliyevin anadan olmasının 100-cü ildönümü ilə əlaqədar Əlahiddə Ümumqoşun Ordunun hərbi hissələrinin və Heydər Əliyev adına Hərbi Liseyin komandaları arasında viktorina keçirilib. Əvvəlcə Ümummilli Lider Heydər Əliyevin və şəhidlərimizin əziz xatirəsi yad edilib, Dövlət himnimiz səsləndirilib.

Çıxışlar zamanı dahi lider Heydər Əliyevin Azərbaycanın dövlət müstəqilliyinin, suverenliyinin və ərazi bütövlüyünün qorunub saxlanılması, eyni zamanda işğal olunmuş torpaqlarımızın azad olunmasını təmin etmək qabiliyyətinə malik Silahlı Qüvvələrin yaradılması yönündə apardığı mütərəqqi islahatlar baradə danışılıb.

Tədbirdə Ümummilli Lider Heydər Əliyevin həyat və fəaliyyətini əks etdirən videoçarxlar nümayiş olunub, Ulu Öndərə həsr olunmuş şeirlər səsləndirilib, rəqs və musiqi nömrələri ifa edilib.

“Vətənə, xalqa və dövlətə xidmət ömrümüzün mənasıdır” devizi altında təşkil olunan viktorinada komandalar Ümummilli Lider Heydər Əliyevin şərəfli və mənalı ömür yolu, siyasi fəaliyyəti, ölkəmizin tarixi, ordumuzun uğurları və digər mövzulardan sualları cavablandırıblar.

Gərgin bilik mübarizəsi şəraitində keçən viktorinada “Motoatıcılar” komandası 1-ci, “Hava Hücumundan Müdafiə” komandası 2-ci, “Rabitəçilər” komandası isə 3-cü yerə layiq görülüb.

Silsilə tədbirlər çərçivəsində Əlahiddə Ümumqoşun Ordunun daimi dislokasiya məntəqələri ilə bərabər ön xətt bölmələrində də ictimai-siyasi hazırlıq məşğələləri keçirilib. Məşğələlərdə bildirilib ki, müasir tariximizə möhtəşəm 20 il kimi yazılan ötən dövrdə ölkə başçısı cənab İlham Əliyevin rəhbərliyi ilə Azərbaycanın siyasi, iqtisadi imkanları genişləndirilib, müasir Ordumuz yaradılıb, ölkəmizin beynəlxalq arenadakı mövqeləri möhkəmləndirilib. Bütün bu nailiyyətlərin təməlində Ulu Öndər Heydər Əliyevin ideyalarının uğurla davam etdirilməsi və xalq-lider birliyi dayanır.

Hərbi hissə komandirlərinin ideoloji iş və mənəvi-psixoloji təminat üzrə müavinlərinin iştirakı ilə “Bizim sözümüz imzamız qədər dəyərlidir” mövzusunda keçirilən dəyirmi masada Azərbaycan Respublikasının Prezidenti, Müzəffər Ali Baş Komandan İlham Əliyevin 20 illik fəaliyyəti dövründə ölkəmizin ordu quruculuğu, təhsil, gənclər-idman, iqtisadi inkişaf, inzibati idarəçilik, xarici siyasət və digər sahələrdə sürətli inkişafı, əldə etdiyimiz böyük uğurlar, misilsiz və qürurverici qələbələr barədə danışılıb. Çıxışlar zamanı bildirilib ki, bundan sonra da xalqımız ölkə başçısının ətrafında sıx birləşərək böyük uğurlara imza atacaq.

Oxşar Xəbərlər