Xocalı rayon İcra Hakimiyyətinin başçısı Şahmar Usubovun müvafiq sərəncamına əsasən, qazi və şəhid ailələri mütəmadi olaraq ziyarət edilir, onların problemləri ilə maraqlanılır.
“QİA.az”ın Xocalı rayon İcra Hakimiyyətindən aldığı məlumata görə, bu gün Vətən Müharibəsi şəhidi, “Vətən uğrunda” medalı ilə təltif edilmiş Elnur Məmmədovun Gəncə şəhəri ərazisində salınmış 600 ailəlik qəsəbədə məskunlaşan ailəsi, Xocalı rayon İcra Hakimiyyəti yanında İctimai Şuranın sədri Qalib Quliyev və Xocalı rayon Kosalar kənd tam orta məktəbinin bir qrup kollektivi tərəfindən ziyarət edilib.
Görüş zamanı şəhidimizin ailə üzvlərinə başsağlığı verilib. Bildirilib ki, torpaqlarımızın ərazi bütövlüyü uğrunda canlarından keçən bütün şəhidlərimizin ruhu xalqımız üçün əzizdir. Onların ailə üzvlərinə dəstək olmaq, köməklik göstərmək borcumuzdur.
Qeyd edək ki, şəhidimizin bizlərə yadigar qalan övladları – Vahid və Yusif Xocalı rayon Kosalar kənd tam orta məktəbində təhsil alırlar. Onların təhsilinə məktəb rəhbərliyi tərəfindən daim diqqət və qayğı göstərilir.
QARABAĞ İNFORMASİYA AGENTLİYİ