“Əhalinin əsaslı hissəsi hesab edir ki, Vətən müharibəsi dövründə ölkə Prezidentinin xarici KİV-ə müsahibələri informasiya müharibəsində qələbə qazanmağımızda həlledici rol oynadı (80.0%). Xarici auditoriya ilə yanaşı ölkə Prezidentinin xalqı mütəmadi məlumatlandırması informasiya siyasətinin ikinci ən çox müsbət xarakterizə edilən cəhəti olub (67.3%)”.
“QİA.AZ” xəbər verir ki, bunu Sosial Tədqiqatlar Mərkəzinin İdarə Heyətinin sədri, deputat Zahid Oruc deyib.
O qeyd edib ki, dünya azərbaycanlılarının erməni təxribatları haqqında dünya ictimaiyyətinə çatdırmaq məqsədilə apardıqları informasiya fəaliyyəti əhalinin müəyyən hissəsi tərəfindən (23.1%) müsbət qiymətləndirilib: “Cəmi 7.2% respondent informasiya müharibəsində uğurlu ola bilmədiyimizi düşünür.
Müharibədən öncə olduğu kimi, 44 günlük müharibə dövründə də televiziyalar əhalinin əsas informasiya mənbəyi kimi qarşıya çıxır (90.4%). Ən çox baxılan televiziya kanalı kimi 62.6% ilə AZTV ilk mövqedə dayanır. ATV (60.2%) və XəzərTV (59.8) isə az bir fərqlə ikinci və üçüncü pillədədir. 42.2% respondent isə məlumatları RealTV-dən alıb.
İnformasiya mənbələri kimi Prezidentin sosial şəbəkə hesabı (21.0%), ətrafdakı insanlar (12.3%) və sosial şəbəkələr (12.0%) növbəti pillələrdə qərarlaşıb.
Ölkə Prezidentini sosial şəbəkədən izləyənlərin əksəriyyəti (79.0%) Twitter platforması üzərindən izləyir. 13.9% respondent isə Prezidentin Instagram, 11.1% isə facebook hesablarından izləyib.
Sosial şəbəkələr arasında Instagram (52.4%) və Facebook (42.9%) istifadəçilərin məlumat üçün ən çox müraciət etdiyi platformalardır.
Narahatedici məqam bundan ibarətdir ki, olduqca az sayda insan müvafiq qurumların saytları (1.5%) və sosial şəbəkə səhifələrinə (1.2%) informasiya almaq üçün müraciət edib.
Əhalinin cəmi 4.2%-i 44 günlük müharibə dövründə internet TV-dən əsas informasiya mənbəyi kimi istifadə edib ki, onların da arasında Kanal 13 (44.0%), Meydan TV (28.0%) və Baku TV (20.0%) diqqət çəkir.
Sorğuya cəlb olunan hər beş respondentdən birinin (20.7%) birbaşa ailə üzvü (qohumlar aid olmamaqla) Vətən müharibəsində ön və ya arxa cəbhədə iştirak edib”.